Saturday, June 11, 2016

සිරියානු හමුදා තබ්කා (Tabqa) ගුවන් කඳවුර දෙසට වේගයෙන් ළඟාවෙති

ඊයේ දිනයේදී සිරියානු රජයේ හමුදා ISIS සටන්කාමීන් පළවා හැර රකා ප්‍රාන්තයේ සෆයේ (Sfaiyeh) මංසන්ධිය අල්ලාගත් හ​. සෆයේ ප්‍රදේශයේ තෙල් ළිං සහ විදුලි බලාගාරයක් ද සිරියානු හමුදා විසින් අල්ලාගන්නා ලදී. මේ අනුව තබ්කා (Tabqa) ගුවන් හමුදා කඳවුරට ළඟා වීමට සිරියානු හමුදාවනට ඇත්තේ තවත් කිලෝමීටර 20 ක් පමණි.

2014 අගෝස්තු අවසානයේදී තබ්කා කඳවුර වැටීමෙන් පසු රකා ප්‍රාන්තයට සිරියානු හමුදා ඇතුලු වූයේ පළමු වතාවටය​. පසුගිය සතියක කාළය තුළ ඔවුහු සටන්කාමීන් පසු බස්වමින් විදුලි වේගයෙන් තබ්කා කරා ඇදෙති. මේ අතර සිරියානු ගුවන් හමුදා මේ වනවිට තබ්කා ප්‍රදේශයට ගුවන් ප්‍රහාර එල්ල කිරීම ආරම්භ කර තිබෙන බව නවතම වාර්තා සඳහන් කරයි.
Raqqa Front on June 10 (Map: Al-Masdar News)

සිරියානු හමුදා වේගයෙන් ඉදිරියට යෑම හේතු කොටගෙන සලාමියා - රකා මාර්ගය කේන්ද්‍ර කරගනිමින් රකා ප්‍රාන්තය තුලට කාවැදුණ ප්‍රදේශයක් ඔවුන් අතට පත්ව ඇත​. මෙම සටන් පෙරමුණ පැත්තෙන් එල්ලවන ප්‍රහාරවලින් ආරක්ෂා කළ යුතුව ඇත්තේය​.

පසුගිය සතිය තුළ ප්‍රතිවාදී ISIS ත්‍රස්තයින් වේගයෙන් පළවා හැරීමට සිරියානු හමුදාවලට ගුවන් ප්‍රහාරවල සහය ඉතා වැදගත් විය​. විශේෂයෙන්ම කාන්තාර ප්‍රදේශවල සැඟ​ව පහරදීම් කළ නොහැකි බැවින් ISIS ත්‍රස්තයින්ට පසු බැසීම හැර වෙනත් විකල්පයක් නොවීය​.

මේ අතර ළඟ එන අනතුර හඳුනාගත් ISIS සටන්කාමීන් තබ්කා ප්‍රදේශයට අතිරේක භටයින් එවමින් සිටින බව තොරතුරු ලැබෙමින් පවතී. මෑතක දී එවන් එක් කණ්ඩායමක් නිරීක්ෂණය කළ සිරියානු ගුවන් හමුදා යානා එම කණ්ඩායමට පහර දී විනාශ කර දැම්මේය​. සටන්කාමීන් 50 ක් පමණ එම කණ්ඩායමෙහි වූ බව වාර්තා වේ.

රකා ප්‍රාන්තයේ බටහිරින් එල්ලවන සිරියානු හමුදා ප්‍රහාර මෙන්ම මන්බිජ් සහ අසාස් ප්‍රදේශවල සිරියානු විපක්ෂ සන්නද්ධ කණ්ඩායම්වල ප්‍රහාර හේතුවෙන් ISIS ත්‍රස්තයෝ රකා ප්‍රාන්තයේදී සැලකිය යුතු අභියෝගයකට මුහුණ පා සිටිති.

කෙසේ වෙතත් නාගරික ප්‍රදේශවලදී කිනම් ආකාරයකින් ත්‍රස්තයින් මෙම අභියෝගයට මුහුණ දෙනු ඇතිදැයි පුරෝකථනය කළ නොහැක​. රහස් උමං, මර උගුල් ආදියෙන් ශක්‍තිමත් කරන ලද නාගරික ප්‍රදේශයක සටන් කිරීම කාන්තාරයේ සටන් කිරීමට වඩා බෙහෙවින් අවධානම් වනු ඇත​.

No comments:

Post a Comment