ඊයේ, එනම් ඉරිදා රාත්‍රියේ, කෙන්යාවේ එල්ඩොරෙට් නගරයේදී යෙගෝ රිය අනතුරකට මුහුණ දුන්නේය. ඔහුගේ නවීන ටොයෝටා ප්‍රාඩෝ රථය අනතුරට ලක්ව දැඩි අලාභහානිවලට ලක් වූයේය.
 |
| PHOTO | WYCLIFF KIPSANG | NATION MEDIA GROUP |
අනතුරෙන් පසු මෙඩිහීල් රෝහලට ඇතුලු කරන ලද යෙගෝ ඊයේ රාත්‍රිය පුරා පරීක්ෂණවලට ලක් කරන ලදී. මාධ්‍යවේදීන්ට ඔහු දැකීමට ඉඩ නොදුන් නමුත් යෙගෝ ෆේස්බුක් හරහා පණිවිඩයක් පළ කරමින් තමා යහපත් තත්ත්වයෙන් පසුවන බව කියා සිටියේය.
ඔහුගේ වාහනයේ ඉදිරිපසට බරපතල හානි සිදුව ඇත. එය එල්ඩොරෙට් මධ්‍යම පොලිස් ස්ථානය වෙත ගෙන යන ලදුව එහි නවතා තිබේ.
යෙගෝ දැකීමට රෝහල වෙත පැමිණි මීටර 1500 ලෝක ශූර ඇස්බෙල් කිප් රොප්, ඔහු හොඳ තත්ත්වයෙන් පසුවන බව සනාථ කළේය.
27 හැවිරිදි ජුලියස් යෙගෝ 2015 මළල ක්‍රීඩා ලෝක ශූරතාවයේදී මීටර 92.72 ක දුරක් හෙල්ලය විසි කර රන් පදක්කම දිනා ගත්තේය. 2016 රියෝ ඔලිම්පික් උළෙලේදී අවසන් තරඟය අතරතුර ආබාධයකට ලක් වූ හෙයින් ඔහුට සියලු විසිකිරීම් අවස්ථා උදා කරගත නොහැකි විය. එහෙත් ඔහු එම තරඟයෙන් ද රිදී පදක්කම දිනා ගත්තේය.
No comments:
Post a Comment